Desacordos na xestión da Fundación Man

Menos de tres meses logo da constitución da Fundación Man de Camelle (longo tempo esperado) o PP anuncia que podería abandonar o padroado do que forma parte, cunha representante, a camellana Dolores Rodríguez.
O portavoz popular, Daniel Rego, asegura que están desconformes co xeito de proceder dos actuais xestores.
No próximo pleno preguntará sobre a contratación da xerente e outra persoa. «A nós nin nos consultaron nin nos explicaron nada. Eu quero saber que se fixo e como. Estamos sopesando abandonar a Fundación, algo que faremos no caso de que non nos convenzan as explicacións».
Tamén espera que lle digan que se está facendo, ademais de contratar persoal. «A miña impresión é que non se está facendo nada», engadiu o portavoz popular.
A Fundación Man quedou constituída o 28 de decembro do ano pasado, cando se conmemoraba o sexto aniverario do falecemento do anacoreta.
Foi (díxose) o primeiro paso para asegurar o mantemento do legado artístico do Alemán, aínda que Rego considera que ese legado corre un serio risco de desaparecer, porque non ven medidas efectivas de protección.
Inicialmente, o padroado quedou integrado por Luís Suárez Pérez, presidente da asociación de veciños de Camelle; Manuel Valeriano Alonso de León (o alcalde); a edila popular Dolores Rodríguez, a socialista Mercedes Martín e Virtudes Rodríguez, presidenta da entidade Rendas. Todos asinaron o acta fundacional ante a notaria Ana Belén Mallada.
Doutra banda, Rego González quere que desde o Concello lle expliquen en que consiste o proxecto de rexeneración da praia de Camelle. «Hai moitos veciños que non saben como van ser as obras e están intranquilos, así que espero que se aclare isto», engadiu.
Máis info : La Voz de Galicia